Publicado en La Región el 23/2/06

"O Xoves de Comadres estrea sete días de diversión, que ofrecen unha ampla oferta gastronómica na fin de semana"

Chega o Entroido e don Carnal comeza a facer das súas. A espontaneidade, a música, os bailes e as cores dos disfraces serán os donos das rúas e romperán, por uns días, a monotonía da vida cotiá. A partir de hoxe, Xoves de Comadres, as distintas localidades da provincia comezan a quentar motores. Hai para tódolos gustos.

Entroideiros e entroideiras, comeza a conta atrás, despois dun ano de longa espera o Entroido xa está de novo aquí. Serán días de excesos, de festa rachada dende a mañá á noite, días de descontrol e de total liberdade, só hai que pensar en bailar e bailar ó son dunha charanga, cantar, rir e disfrutar e, aproveitar para ser, por unhas horas outro, un paiaso, un pirata do Caribe, un brasileiro, un pato ou un home de Cromagnon, non importa, só fai falla imaxinación. A maleta está preparada, chea de disfraces cos que percorrer a provincia, que ofrecen ós visitantes o seu particular modo de entender e vivir o Entroido. Ésta é tan só unha das propostas das moitas que hai, ¿acompañádesme?

HOXE, VERíN E OURENSE

Hoxe é Xoves de Comadrese as mulleres son as protagonistas. Despois dunha cea chega a hora de recibir á Raíña do Entroido, dona Elena, que baixa dende o Castelo ata o barrio de San Lázaro. As comadres e as charangas animarán a procesións dos fachóns ata a praza García Bar bón. A festa xa está acesa e durará o que teña que durar.

VENRES, CELANOVA

É o Venres Colchoneiro e penso dirixirme a Celanova e ver como é esta festa. A partires das 21.00 horashaberá unha concentración na Praza Maior con todos os que se atrevan a meterse nunha funda de colchón e pasar toda a noite dentro, vendo, bebendo e falando a través dun pequeno burato.

SÁBADO, MACEDA E VILARIÑO DE CONSO

Será un día intenso, a eso das 9.30, saen os primeiros Felos, o traxe típico de Maceda e farán un percorrido por todas as aldeas do Concello. Despois, rumbo a Vilariño de Conso, un dos entroidos xunto co veciño de Viana do Bolo, que por estaren máis alonxados convervan prácticamente intactas a súas tradicións. Ás 12.00 horas saen os folións coa súa tamborrada a percorrer as rúas da localidade e poderánse ver os primeiros boteiros, o traxe típico que comparten tamén con Viana e que destaca pola súa gran pantalla multicolor, que pode chegar a pesar uns 20 kilos e ter unha extensión de un metro cadrado, é realmente espectacular. Unha vez en Vilariño hai que aproveitar para degustar o cabrito.

Será as 14.00, na carpa situada na área recreativa do pavillón. O próximo destino será Xinzo de Limia, alí non hai descanso e toda a tarde haberá “charangueo" polas rúas da vila. Ás 19.00 horas os máis inxenionos e satíricos da vila participan na XXIV edición do Festival da Canción Humorística do Entroido. Despois festa rachada ata que o corpo aguante en Xinzo.

DOMINGO, VIANA E OURENSE

Ten especial interese a Festa da Androlla en Viana do Bolo, e o desfile de folións e boteiros. Pódese beber, bailar e encher o bandullo dun dos pratos máis típicos e singulares da zona. Pola tarde, unha parada en Verín, é o domingo gorgo e merece a pena ver ós cigarróns impondo a súa propia lei. Despois, é o gran desfile en Ourense, non é o Entroido máis tradicional pero cada vez hai máis ambiente. ¿Cansados? Queda moita noite, ás 22.30, está prevista unha festa rachada na praza do Correxidor, haberá charangas e o concurso de comparsas.

Ver noticia original en La Región