"Dende o Grupo Municipal do Bloque Nacionalista Galego de Maceda compracémonos en informar da publicación no Diario Oficial de Galicia da saída a concurso das obras de acondicionamento da estrada OU-101, no tramo que vai dende o Parque Tecnolóxico de Galicia ata Maceda. Isto ben a significar o comezo inminente dunhas obras insistentemente reclamadas tanto dende a Alcaldía do noso Concello como dende este grupo que representamos.

Segundo a información publicada no DOGA do 22 de xullo o orzamento base de licitación do proxecto ascende a 10 millóns de euros e o prazo de execución das obras será de 24 meses dende o seu comezo.

Tiveron que pasar varios gobernos da Xunta e varios gobernos locais ata que agora, co impulso do noso partido en ámbalas dúas institucións, por fin vemos que se dan pasos definitivos para o arranxo da principal vía de comunicación da nosa vila coas zonas industriais da provincia e con Ourense.

Ninguén negará que nos levou o noso tempo e o noso esforzo, e nós non podemos esquecer aquelas manifestacións do ano 98 nas que o BNG liderou o sentimento da necesidade que todo o pobo manifestaba con respecto ó arranxo da estrada, máis nós non queremos quedarnos aí.

Dende o Grupo Municipal do BNG de Maceda vemos este anuncio non coma un punto final ou un logro acadado, senón coma o punto de partida dunha situación que nos vai proporcionar novas oportunidades e nas que, dende xa, nos atopamos traballando. A estrada por si soa non nos vai resolver os problemas do noso pobo, só o aproveitamento intelixente desta nova situación mellorará a calidade de vida dos nosos veciños e nos permitirá dotar a vila de mellores servizos.

Maceda Xullo 2008"