«Esta obra rescata a faceta máis humana de Benigno Álvarez»

O historiador de Maceda recolle nun libro, que se presenta mañá no castelo, a figura do líder comunista represaliado

O castelo de Maceda vivirá mañá unha cita longo tempo agardada: a recuperación dunha figura emblemática da comarca e da provincia que viu truncada a súa vida pola represión falanxista que trouxo consigo a guerra de 1.936. Na Torre da Homenaxe presentarase ás 20:00 horas o libro Benigno Álvarez. Un comunista na Galiza dos anos 30, do que é autor Santiago Prol. No acto participarán o alcalde Xabier Oviedo, Afonso Eiré (Conselleiro delegado de Promocións Culturais Galega, que edita a obra), Bieito Seara, o historiador Francisco Carballo e o propio autor.

-¿Como nace o proxecto que agora ve a luz neste libro?

-Era unha asignatura pendente que tiñamos dende hai anos en Maceda. En 1996 encargoume A Nosa Terra que lle fixese o apartado sobre Benigno Álvarez (Maceda, 1900-1937) para un traballo que se chamaba Os mártires do 36. En 1997, co PP gobernando en Maceda, na Deputación, na Xunta e no Estado, un grupo de amigos conseguimos que Benigno Álvarez tivese unha praza no seu pobo e levantar un monolito aos mártires do 36. E quedaba facer un traballo como este, que trata a súa figura de forma rigurosa.

-¿Recupera a obra os episodios da represión que se están a sacar á luz no marco da memoria histórica?

-Non. Do Archivo Histórico Militar de Ferrol saquei 1.500 documentos referidos á represión falanxista en Maceda, mais non se trataba diso senón de recuperar a figura de Benigno Álvarez. Si que se dan algúns apuntes para enmarcar o momento histórico, pero o obxectivo era recuperar e arroxar luz sobre unha persoa que tivo unha especial relevancia naquel momento e coido que esta obra rescata a faceta máis humana de Benigno Álvarez.

-¿Que aspectos se aportan nese senso?

-É fundamental descubrir que a filla está viva, no libro inclúese unha entrevista que lle fixen hai uns anos, e como veu semiclandestinamente a coñecer o pobo do seu pai, ao que non chegou a coñecer xa que o mataron cando ela só tiña tres meses. Recóllese a faceta de columnista en La República, as súas ponencias sindicais ou as súas colaboracións en Mundo Obrero e outros documentos.

-¿Con que se vai atopar o lector que se achegue a esta publicación?

-Cun Benigno Álvarez sen a aureola mítica de revolucionario, a que lle valeu o alcume de La fiera comunista, máis que gaña en calidade humana e que aparece na súa verdadeira medida e facendo xustiza á importancia que tivo como militante comunista e líder revolucionario.

Ver noticia original en La Voz de Galicia