Publicado en Xornal.com el 30/4/05

Maceda acollerá os próximos días 10 e 11 de maio un seminario promovido polo Igape para facilitar o acceso e o uso das novas tecnoloxías polos directivos, xestores ou empresarios como ferramenta para impulsar a competitividade empresarial. O encontro, que se organiza contando coa colaboración dos concellos de Maceda, Baños de Molgas, Xunqueira de Espadañedo e Esgos, forma parte dun ambicioso ciclo que comprende 60 seminarios divulgativos específicos para difundir entre as Pemes de toda Galicia o uso de ferramentas como internet, o correo electrónico ou as webs de carácter empresarial.

XORNAL Santiago .- Con oito horas de duración e carácter gratuíto, o seminario desenvolverase na casa consistorial do Concello de Maceda. Impartirase en dúas xornadas, en horario de tarde de 16:00 a 20:00 horas. Os interesados en participar deben inscribirse previamente, o que poden facer dirixíndose o nº tf: 988463001 ou a través do correo electrónico: concellodemaceda@yahoo.es

Este ciclo de seminarios impulsados polo Igape para difundir o uso das tecnoloxías da información nas empresas está previsto que chegue a todas as comarcas galegas. O Igape promove este ciclo de seminarios desde o convencemento de que as novas tecnoloxías da información son de capital importancia para facilitar novas relacións individualizadas entre productores e clientes, pero tamén pode ser unha ameaza para aquelas empresas que non saiban valerse delas nos seus procesos.

Entre outros contidos, nestes seminarios abordaranse aspectos relacionados coa utilidade empresarial de Internet, as vantaxes do uso do correo electrónico ou a utilización de diferentes webs de interese empresarial: promocións empresariais, servicios de información, comercio electrónico, banca electrónica, etc. As posibilidades de utilización axeitada destas tecnoloxías na empresa comprenden dende a reducción de custos ata o incremento do valor engadido para productos e servicios, pasando pola reducción de riscos.

EN 2004 HOUBO 60 SEMINARIOS NOS QUE PARTICIPARON 734 EMPRESARIOS.- O desenvolvemento destes seminarios promovidos polo Igape faise contando coa colaboración de organismos intermedios ou entidades de promoción económica local. En total, na convocatoria de 2004 leváronse a cabo 60 seminarios nos que participaron 734 empresarios, técnicos ou xestores de Pemes de toda Galicia.