Publicado en Yahoo Noticias el 6/7/05

O I Premio Rosalía de Castro recaeu no instituto santiagués do mesmo nome ca escritora

A Fundación Rosalía de Castro deu a coñecer esta mañá en Padrón o fallo da primeira edición do premio que convoca para experiencias pedagóxicas, destinado a potenciar o coñecemento da obra da autora, que recaeu no instituto IES Rosalía de Castro, de Santiago.

O instituto compostelán gañou o premio, dotado con 3.000 euros, polo proxecto 'Verbas de Rosalía/Grafías de Rosalía', que ofrece unha ilustración completa dos poemarios Cantares Gallegos, Follas Novas e En las Orillas del Sar. O xurado destacou del que é "un proxecto moi ambicioso".

O segundo premio desta primeira edición, dotado con 1.500 euros, foi parar ó IES San Mamede de Maceda, en Ourense. A organización destacou del o seu "carácter innovador" e a utilización de diferentes materias e expresións para relacionar a vida e obra de Rosalía co cine, teatro e banda deseñada.

A fundación concedeu tamén unha mención especial ós traballos realizados polos centros Doroteas de Pontevedra, La Inmaculada de Marín, CPI Progresa de Catoria e o CEP Pilar Maestú de Pobra do Caramiñal.

A presidenta do xurado que fallou o premio, Helena Villar Janeiro, destacou a satisfacción da organización pola calidade e a cantidade de traballos presentados a esta primeira edición do premio e agradeceu a involucración do profesorado na iniciativa. A cerimonia de entrega terá lugar o 15 de xullo, coincidindo cos actos conmemorativos do nacemento da poetisa.