O tempo acompañou e o día, sábado, tamén. Xa desde primeiras horas da mañá víanse nas rúas da cidade grupiños de xóvenes ataviados con bolsas de viandas para subir en roupa deportiva ó monte a facer o magosto, tradición imprescindible nesta terra nestas datas do San Martiño. Baños de Molgas, Maceda, Pobra de Trives, Xinzo e tantas outras vilas e aldeas da provincia fixeron a súa festa onte. Correron as castañas asadas, os chourizos, a carne ó caldeiro, o viño e os doces como a bica dabondo.

En Allariz comezaba onte a doceava Feira do Outono cun cheo de xente no pavillón onde hai máis de corenta expositores chegados da comarca e doutros puntos da provincia como é o caso de Petín con cogomelos, augardente e mel. A vila está animada grazas a esta convocatoria xa veterá que atrae a moito público. Todos tipo de alimento de temporada podíase comprar nos postos ben colocados, desde vexetais ata queixos, doces, castañas, pan artesanal, licores ou libros que teñen que ver co tema da feira.

Na sala da vella Praza de Abastos está a mostra dos cogomelos e o obradoiro de cestería dos artesáns do Val de Lobeira. Como non chove, hai problemas para amosar exemplares de cogomelos en vivo. Pola tarde deu unha conferencia o enxeñeiro Xaime Blanco, do grupo de traballo que estuda os fungos ameazados. Blanco falou do Clitocybe Alaricensis , cogomelo exclusivo desta Reserva da Biosfera. «É unha especie que atopei en exclusiva nesta terra no ano 2005 e é agora cando a publicamos, dándoa a coñecer a todos», sinalou o poñente. Distínguese este fungo polo seu forte cheiro espermático e por ter como rareza as esporas de cor ocre e pardo. Seu sabor, dixo o experto, é desagradable. Non é un cogomelo comestible.

O experto disertou tamén sobre seis especies de fungos que están en perigo de extinción e tamén se atopan na terra alaricana. «Tres deses fungos están na lista das 33 especies ameazadas segundo o Convenio de Berna e hai outras tres que se atopan no borrador da Península Ibérica como lista vermella», engadiu Xaime Blanco.

Pola noitiña houbo contacontos con Pepe Penabade e Cándido Pazó seguido dun cátering a base de castañas e produtos de outono. Pola noite inda houbo concerto da Compañía do Ruído no Roi Xordo. E nos restaurantes son moitos os que degustan estes días o menú de temporada co que Allariz sorprende ó visitante.

Ver noticia original en La Voz de Galicia